Líf sæbjúgnanna

 

Myndlistasýningin „Líf sæbjúgnanna“ var opnuð  laugardaginn 5.apríl, í 002 Gallerí, Þúfubarði 17 í Hafnarfirði. Sýningin er samstarfsverkefni tveggja „myndlistarpara“, en þau eru annars vegar Lilý Erla Adamsdóttir og Trausti Dagsson og hins vegar Elín Anna Þórisdóttir og Páll Ívan frá Eiðum. Sýning þeirra er annar myndlistarviðburður af átta á fyrstu Myndlistarhátíð 002 Gallerís,

Í lífi sæbjúgnanna hafa myndlistarpörin fundið sameiginlegan snetiflöt í myndsköpun sinni: „Líf sæbjúgans er einmannalegt. Ferðum þess er að miklu leyti stjórnað af hafstraumum, tengsl einstaklinga virðast tilviljunarkennd og sum þeirra hafa einungis eitt líkamsop er þau nota jafnt til að matast og hafa hægðir. Einmanalegt virðist líf þeirra sem hafa ólögulegan líkama sem helst minnir á getnaðarlim, bjúga eða gúrku en frá þessum tveim síðari fyrirbrigðum kemur nafn sæbjúgans einmitt á íslensku og á ensku. Það skýtur þó skökku við að líkja því við gúrku, ávöxt sem styr stendur um hvort teljast skuli ávöxtur eða grænmeti. Vissulega vex hann á plöntum, inniheldur fræ og þroskast út frá blómi en sætleikann vantar. Hann er grænn, er hafður í salöt ásamt öðru grænmeti. Slíkar eru ekki áhyggjur sæbjúgans þrátt fyrir eymdarlegan líkama og gildishlaðinn munn eða endaþarm, eftir því hvora hlið líkamsops þess við beinum sjónum okkar að. Sæbjúgað hirðir ekki um skilgreiningar framandi aldinna því slíkt er líkt og við mennirnir værum þjakaðir af áhyggjum yfir deiliskipulagi fjarlægrar borgar í öðru stjörnukerfi eða fatavali guðanna. Áhyggjur sæbjúgans liggja nefnilega ekki þeim megin hafflatarins sem það eyðir einmanalegri ævi sinni.“

 

Hægt er að sjá fleiri myndir Hér

Staðsetning Þórarins Blöndal í 002 Gallerí

Föstudaginn 28. mars klukkan 18.00 opnaði Þórarinn Blöndal myndlistarmaður einkasýninguna Staðsetningu í 002 Gallerí að Þúfubarði 17 í Hafnarfirði. Sýning Þórarins er sú fyrsta af átta myndlistarviðburðum á fyrstu Myndlistarhátíð 002 Gallerís, sem stendur frá 28. mars til 1. júní 2014.

Þórarinn sýnir nokkur þrívíð verk og ljósmyndir sem eru unnin í nánu samhengi við sýningarrými 002 Gallerís, en það er íbúð og vinnustofa myndlistarmannsins Birgis Sigurðssonar. Þetta óvenjulega gallerí hefur verið starfrækt um þriggja ára skeið í ósköp venjulegri kjallaraíbúð í blokk í Hafnarfirði, en nú í fyrsta sinn flytur Birgir ekki allt sitt hafurtask úr íbúðinni fyrir sýningu í galleríinu.

Gaumgæfir Þórarinn eftir tengingum og snertiflötum þeirra beggja og hvernig nýr viðkomustaður breytir för. Ferðalagið hófst fyrir nokkru og kveikjan var gamalkunn árátta og þrá eftir hinu óvænta. Renna vinnustofa Þórarins, verkferlar og fyrirætlanir saman við hýbýli og vinnustofu  Birgis og sá núningur ákvarðar nýja staðsetningu.

Þórarinn Blöndal er fæddur á Akureyri 1966. Hann stundaði myndlistarnám á Akureyri, í Reykjavík og Rotterdam, Hollandi. Hann hefur tekið þátt í fjölmörgum sýningum bæði hér heima og erlendis. Á síðasta ári má telja samsýningar í firstlines gallery og Halle50 í Munchen og Samhengi hlutanna í Listasafni Akureyrar

Hægt er að sjá fleiri myndir Hér

Myndlistarhátíð 002 Gallerí

Messa Teaser á Kex Hostel

Messa Teaser 2011 er óhefðbundin sölu og tengslaviðburður á sviði samtímalistar,  þar sem sérstök áhersla er lögð á þátttöku sjálfstætt starfandi myndlistarmanna og myndun tengsla. Þátttakendur MESSA Teaser eru myndlistarmenn, gallerí, útgefendur, listfræðingar og fleiri aðilar sem tengjast myndlist á einn eða annan hátt. Þátttakendur fyrir 002 Gallerí voru Helena Hans, Elín Anna Þórisdóttir og Birgir Sigurðsson

Frá íbúð að galleríi

Við stofnum 002 Galleríis var sú ákvörðun tekin að tæma alltaf íbúðina fyrir sýningar þannig að hún nýttist öll til sýningarhalds, allir 63 fermetrarnir. Búslóðin var minnkuð um ca 40% svo að ferðalagið frá íbúð til gallerís og til baka aftur, tæki sem stystan tíma. Vegna fjölbreytileika sýninga hefur þurft að smíða og hengja upp festingar fyrir alls konar verk og skjávarpa bæði á veggi og loft gallerísins. Listamenn hafa verið duglegir við að mála og spreyja á veggina, enda eru núna komin þó nokkur lög af málningu á suma veggina. Á þessum þremur árum sem galleríið hefur starfað hefur hvert einasta herbergi verið notað á ýmsa vegu til sýningarhalds, með góðum árangri. Þessi myndaröð veitir innsýn í þetta ferðalag.

Hægt er að sjá fleiri myndir Hér

Jón Laxdal og 002 Gallerí í Reykjavík

Sýning á verkum myndlistarmannsins Jóns Laxdal opnaði á heimili myndlistarmannana Jóhanns Ludwig Torfasonar og Ragnhildar Jóhanns að Sundlaugavegi 10, 105 Reykjavík, laugardaginn 31. ágúst 2013.

Jón hefur um árabil verið virkur í menningarstarfi á Akureyri. Hann átti hlut að rekstri Rauða hússins og var í hópi þeirra sem hófu Listagilið á Akureyri til vegs og virðingar. Jón kom eftir krókaleiðum inn í myndlistina. Hann nam heimspeki við Hí og hefur látið að sér kveða í skáldskap með útgáfu nokkura ljóðabóka.

Jón hefur haldið á þriðja tug einkasýninga ásamt þátttöku í fjölda sýninga bæði heima og erlendis. Verk eftir hann eru í eigu safna og safnara víða um heim.

002 Gallerí hefur verið starfrækt síðast liðin þrjú ár á heimili Birgis Sigurðssonar í Hafnarfirði og þar hafa yfir fimmtíu listamenn víðs vegar að sýnt verk sín. Galleríið nýtur mikillar sérstöðu í listflóru landsins, þar sem það er í raun íbúð og vistaverur galleristans sem gengur svo langt í að hreinsa út úr íbúðinni fyrir hverja sýningu að ekkert er eftir nema hylkið.

Í þetta sinn gengur 002 Gallerí skrefinu lengra með einskonar yfirtöku á annari íbúð til sýningarhalds. Þó er skrefið sínu styttra því leitast er við halda í heimilið en hleypa myndlistinni upp á veggina. Þannig verður til n.k. heimasýning sem kallast á við hinn forna húslestur.

 

Hægt er að sjá fleiri myndir Hér

Mannmergð

Arnar Ómarsson, myndlistarmaður, opnaði sýningu á 002 Gallerí í Hafnarfirði, laugardaginn 10. Ágúst 2013. Verkið „Users / Notendur“ er hluti af seríu veggteikninga sem Arnar hefur unnið með síðastliðið ár og fjallar um einstaklinginn í mannmergðinni. „Ég fæ vissulega innblástur frá skólaárunum í London, þar sem maður mætti þúsundum fólks út á götu hvern dag, án þess að sjá það nokkurntíman aftur“ segir Arnar. „Það má segja að þetta sé einskonar tilraun til að staðfesta tilvist þeirra án þess að reyna að kynnast þeim eitthvað betur. Teikningarnar eru eins og kynnin; taka stuttan tíma, eru aldrei eins og skilja ekki mikið eftir sig.“ Í þessari sýningarröð hefur Arnar bæði sýnt í Þýskalandi og á Íslandi, en það sem er sérstakt  við þessa sýningu er að hér teiknar hann beint á veggi íbúðarinnar.

Hægt er að sjá fleiri myndir Hér